Ġudizzju

Il-jum tal-ġudizzju –

u l-bnedmin jinsabu miġbura.

Huma jistqarru quddiem il-Mulej

li qiegħed fuq it-tron tiegħu:

“M’aħniex denji

li nidħlu fil-Preżenza tiegħek.

Ma tajnikx qima!

Ma tajniex ġieh

lill-Isem qaddis tiegħek!

Il-festi tiegħek ma ċċelebrajniehomx

b’mod xieraq u qaddis!

Lgħabniha ta’ nsara

u bdilnik ma’ allat oħra!

Qasqasna u ma rrispettajniex

il-ħajja tal-proxxmu tagħna!

Aħna, Mulej, imniġġsa,

m’aħniex safja!

Imbagħad il-Mulej jitbissem minn fuq it-tron

u jgħidilhom:

“Min talabkom biex tkunu safja?

Quddiem Alla, min hu denn u safi?

Xejn aktar ma tlabtkom

ħlief id-don ta’ l-imħabba,

anki jekk tagħtu biss farka.

Xejn aktar ma tlabtkom

ħlief il-ħniena

anki jekk tagħtu biss naqra.

Xejn aktar ma tlabtkom

ħlief it-tjieba,

anki jekk tagħtu biss nitfa!

Tajtu lilkom infuskom

u l-faqar tagħkom.

Dan biżżejjed!

L-aqwa li ħabbejtu bl-imħabba tiegħi!

Kollox inħafrilkom!

Ejjew gawdu l-hena u l-qdusija tiegħi!”