Litanija ta’ l-Għotja
Int aċċettajt
li ssir wieħed minna
biex tkun ma’ ħutek.
Int aċċettajt
li tbaxxi rasek għal kollox
biex issalva lid-dinja.
Int aċċettajt
li tagħtina l-Kelma tiegħek
biex turina t-triq id-dejqa
li twassal għall-veru ferħ.
Int aċċettajt
li toqgħod għall-passjoni
biex tagħti l-hena
lill-kotra.
Int aċċettajt
li tagħti ġismek
u xxerred demmek
biex turi l-imħabba tiegħek.
Int aċċettajt
saħansitra li tmut
bl-aktar mewta ħarxa
biex tiftħilna l-bieb għall-ħajja.
Int aċċettajt
li turi ħniena u mħabba bla tarf
biex tfejjaq lil dawk
maħkuma mill-biża’!
Għalina offrejt kollox, Mulej,
int tassew għotja għalina!