Sempliċiment
Mhux ħaġa diffiċli biex tagħmel it-tajjeb, Mulej,
it-tajjeb jista’ jsir mill-qalb,
permezz tal-fidi tagħna
u b’idejna stess!
Li nagħmlu xi ħaġa tajba
hu l-frott naturali
tal-fidi tagħna
u mhux ħlief l-espressjoni
ta’ l-umanità tagħna.
Kollox jiddependi
minn kemm inħarsu lejn Kristu
li kien jaħdem u jitkellem
bl-għan ewlieni
li jagħmel il-ġid fid-dinja.
Kollox jiddependi
minn kemm nimxu ’l quddiem
fil-vanġelu tiegħu!
Kollox jiddependi
minn kemm nittrattaw liċ-ċkejknin
bl-istess mod li nittrattaw
xi ħadd imlaħħaq u mportanti.
Kollox jiddependi
minn kemm inqisu lilna nfusna
bħala sempliċi qaddejja.
Hawn aħna, Mulej, f’idejk,
biex nagħmlu t-tajjeb!